Troubrek, leafde en in swymke moard

Koarte ynhâld:
Kim jout har freondinne Puck in rûnlieding yn de klinyk fan har heit, wêr’t se tegearre mei har styfmem Margot wurket.
Puck hopet net dat se de heit fan Kim tsjinkomt om’t se wit dat hy leafde tusken itselde geslacht ûnakseptabel fynt. As de man dan te betiid thúskomt, reagearret se ad rem en spilet fol oertsjûging Pauline Goeman. Sadwaande hat Arthur net yn ‘e gaten dat se de skarrel fan syn dochter is. Ek Margot hat in geheim. Se hat in ferhâlding mei Danilo, in kollega by de operetteferiening. Se komt op in jûn thús mei Danilo, dy’t syn operette kostúm noch oan hat. Arthur komt ek harren oer it mat. Danilo reagearret ek hiel ad rem en spilet in dronken en sjongende Danilo út de operette Die Lustige Witwe. Ek dat hat Arthur net yn ‘e gaten. Sûnt in pear wike wurket Henriëtte Storm as húshâldster yn ‘e klinyk. Se hat in grut geheim. Margot en Kim ha it hieltyd mei Arthur oan ‘e stôk en se prakkesearje der oer om fuort te gean. Mar oan ‘e iene kant kinne se it wurk net misse en oan ‘e oare kant hâldt ek de finansjele sitewaasje harren tsjin. Yn in joalige bui sizze se dat se Arthur it bêste mar fermoardzje kinne, om sadwaande gau jild te ervjen. Dêrneist betinke se ek noch in manier om harren grutte leafde de hiele dei by harren hawwe te kinnen. Puck wurdt yn de klinyk ûnderbrocht as Paul de Bock en Danilo komt as iene Gudrun aus Kaprun en jout him út as in âld freondinne fan Margot. Arthur hat it al gau op Gudrun fersjoen, mar ûntdekt dan hoe’t de foarke yn ‘e stôk sit en komt ta it beslút om it spultsje mei te spyljen. Henriëtte kin it net oansjen en grypt yn…

Troubrek, leafde, hearlike dûbelrollen en leuke dialogen soargje, nettsjinsteande in moard, foar in fleurige jûn.